Todays Nepal
No1 Nepal's Complete News Sites

‘सेतो कपालले केही गर्न सक्दैन भन्ने होइन, ८६ का गिरिजाले ५६ का प्रचण्डलाई डोर्याएकै हुन्’

6,626

नेपाली कांग्रेसका प्रवक्ता विश्वप्रकाश शर्मासँगको कुराकानी आजको अन्नपूर्ण पोस्टमा छापिएको छ । उक्त कुराकानीको केही अंशः
कांग्रेस रुपान्तरणका मुख्य कार्यसूची केके हुन् त ?
अब चाडै बस्ने पार्टी केन्द्रीय कार्यसमितिको बैठकले अबको कार्यसूची तय गर्ने छ । त्यसपछि हामी त्यही रोडम्यापमा अगाडि बढ्ने हो, तर निर्वाचनको सवालमा हामी निर्वाचन गराउन जति गम्भीर भयौं, निर्वाचन जित्न त्यति गम्भीरतापूर्वक लाग्न सकेनौं ।

हामी निर्वाचनमा गइरहँदा हाम्रो नेतृत्वलाई पहिल्यै थाहा थियो कि, हामी कमजोर छौं । तर पनि संक्रमणकाल अन्त्य हुन्छ भनेर हामीले निर्वाचन गरायौं । तर हामी जनतासँग सम्वाद गर्ने सवालमा कमजोर देखियौं । कांग्रेसले गरेका सत्कर्मलाई हामीले प्रचार गर्न सकेनौं । मुलुक ७५ जिल्लाबाट ७७ जिल्लामा परिणत भयो । सात वटा प्रदेश बने तर हामी हाम्रो पुरानै सांगठनिक संरचनामा कुनै सुधार नगरीकनै चुनावमा गयौं ।

प्रदेशस्तरीय कमिटी बनाउन सकेनौं । प्रदेशअन्तर्गत दुई प्रदेशस्तरीय समिति बनाउन सकेनौं । पदाधिकारी चयनदेखि सांगठनिक परिचालन सही ढंगले गर्न सकेनौं, जसको प्रतिफल चुनावमा देखियो । अब भने हामीले पार्टीको व्यापक परिवर्तनका कुरा गरिरहेका छौं । तर, मेरो विचारमा केन्द्रदेखि गाउँ तहसम्मैको नेतृत्व शैलीमा व्यापक परिवर्तनको खाँचो छ ।

के अहिले ७० कटेकाले विश्राम लिनुपर्ने आवाज उठेको छ । उमेरको हद ७० बर्ष कटेकालाई विश्राम दिनतिर कांग्रेस लाग्ला त ?
पार्टी निर्वाचनमा पराजित भएर फर्केपछि कतिपयलाई यस्तो लागेको छ कि, वृद्ध नेतृत्वलाई बिदा गर्नुपर्छ । तर मेरो बुझाइमा राजनीतिमा एज होइन कि एजेन्डालाई प्रधान मान्नुपर्छ । सेतो कपालले केही पनि गर्न सक्दैन भन्ने होइन र कालो कपालले मात्रै सबै राम्रो गर्छ भन्ने बुझ्नु गलत हुन्छ ।

२०४६ सालमा गणेशमानजीले पार्टी र जनआन्दोलनलाई नेतृत्व दिइराख्दा उहाँ ७६ बर्षको हुनुहुन्थ्यो । गान्धीकै कुरा गर्नुहुन्छ भने उमेरको उत्तरार्धमा धेरै महत्वपूर्ण काम गरेको देखिन्छ । तर, यसको अर्थ यो पनि हेइन कि युवाहरुलाई दिनु नै हुँदैन । पाका र युवा सबै विचारमा एकतावद्ध भएर अगाडि बढ्नुको विकल्प छैन ।

नेपालको उदहारण दिँदा ८६ बर्षका गिरिजाप्रसादले ५६ बर्षका प्रचण्डलाई डोर्याएको पनि देखियो । अमेरिकामा ४६ बर्षका बाराक ओबामाले वृद्ध जोन म्याकेनलाई पराजय गरेको देखियो । उमेरमा पाको भए पनि नेल्सन मण्डेलाले दक्षिण अफ्रिकामा रंगभेदविरुद्ध आन्दोलनको नतृत्व गरेर सफलतामा पुर्याए । त्यसकारण युवालाई सुम्पिँदैमा कांग्रेस सुध्रिन्छ भन्ने होइन । कांग्रेस आवेगमुक्त भएर सबै मिलेर अगाडि बढ्नुपर्छ ।

Leave A Reply

Your email address will not be published.

%d bloggers like this: