Todays Nepal
No1 Nepal's Complete News Sites

खाल्डोमा पुरिएको सात घण्टापछि जीवितै उद्धार…

7,699

मानिसलाई खाल्टोमा गाडियो भने कति मिनेट बाँच्न सक्छ ? सायद सबैको उत्तर एउटै हुन्छ, दुई/तीन मिनेट। तर, सिरहाको नवराजपुर गाउँपालिका १ तामासुइया चोकमा एक युवकलाई खाल्टोभित्र गाडेको सात घण्टापछि जीवितै निकालिएको छ।

विश्वास नै नलाग्न सक्छ। तर खाल्टोभित्रै सात घण्टा बिताएर भारत मधुवनी जिल्ला बसहा गाउँका अन्दाजी २० वर्षीय जितेन्द्र मण्डलले अनौठो कला देखाएका हुन्।

खाल्डोमा पस्नुअघि उनले मुखको विभिन्न ठाउँमा सुई पनि रोपेका थिए। दिउँसो ३ बजे उनलाई खाल्टोमा गाडिएको थियो। सात घण्टापछि राति १० बजे खाल्टोबाट उनको जीवितै उद्धार गरिएको हो। उनलाई हेर्न स्थानीय सयौँ मानिसको घुइँचो लागेको थियो। उनको अनौठो कलाले सबै चकित भएका छन्।

स्थानीय जयनाथ यादवका अनुसार मण्डलसहित पाँच जनाको टिम विगत ६ दिन अगाडिदेखि तामासुइयामा विभिन्न अनौठो खेल प्रदर्शन गर्दै आएका छन्। ‘बुधबार अन्तिम दिन ठूलो खाल्टो खनेर मण्डललाई माटोले पुरियो’, उनले भने, ‘हामी गाउँलेलाई डर पनि लागेको थियो। तर उनीहरुले केही हुँदैन भनेपछि गर्न दियौं। सात घण्टापछि खाल्टोबाट मण्डललाई फेरि जीवितै निकालियो।’

सात घण्टासम्म माटोमा गाडेपछि जोकोही बाँच्न सक्दैन्। उनीहरुले जादु कलाले मानिसलाई सात घण्टासम्म खाल्टोमा राख्ने गरेको नवराजपुर १ का वडाध्यक्ष रामऔतार यादवले बताए। उनले भने, ‘कसैले कल्पना पनि गर्न नसक्ने खेलहरु उनीहरुले गरेर देखाएका छन्।’

केही खेल जादू र केही निरन्तर अभ्यासको आधारमा उनीहरुले चटक गर्ने गरेका छन्। न ब्रेक, न घण्टी भएको साइकल हात छोडेर चलाउँछन् र सबै दर्शकलाई आश्चर्यचकित पार्छन्। छात्तिमा मोटरसाइकल गुडाउन पनि लगाउँछन्। विभिन्न गीतमा डान्स पनि साइकलमै गर्छन्। यस्ता कैयौं अनौठो खेल गरेर उनीहरुले पैसा कमाउने गरेका छन्।

विभिन्न अनौठा खेल देखाएपछि उनीहरु राम्रो कमाइ पनि गरिरहेका छन्। उनीहरुले एउटा गाउँमा गएपछि करिब सात दिनसम्म दिउँसो दुई घण्टा र राति दुई घण्टा गरी दैनिक चार घण्टा कला देखाउने गरेका छन्। कला देखाउने सो टिमका मो। रियाजले सात दिन खेल देखाउँदा करिब ५०/६० हजार रुपैयाँ कमाउने गरेको बताए। उनले भने, ‘अनौठा खालका खेल देखाएपछि दर्शक खुसी भएर आफँ पैसा दिन्छन्।’

Leave A Reply

Your email address will not be published.

This site uses Akismet to reduce spam. Learn how your comment data is processed.

%d bloggers like this: